طرد الإخوان من الميدان بسبب الآتى

اللى حصل فى الميدان امبارح  27-1-2012...

انا كنت فى الميدان امبارح ...
و الله العظيمـ اللى هاقوله دة اللى حصل بـ اللى لينا و اللى علينا ..

صوت منصة الإخوان طول اليومـ واصل للمنصات التانية ..
و امبارح بـ الذات بعد ماتكلمـ أخو الشهيد أحمد بسيونى ..
و قال كلامـ ضدهمـ و انهمـ بيحتفلوا على دماء الشهداء بعد ماخدوا البرلمان ....
وقتها عاللوا صوت القرآن أكتر عشان يغطى على صوتنا ...

و أكتر من مرّة نوجهلهمـ طلب انهمـ يوطوا الصوت ..
بسـ كان لا حياة لـ من تنادى !

مانكرش ان بعد كدة فيه بعض الناسـ حدفت عليهمـ أزايز مياة بلاستكـ ..
و مانكرش برضو ان اترفع فى وشهمـ الدزمـ ..

بسـ الرد الأصلى اللى كان عليهمـ اننا هتفنا ضدهمـ :ـ
ـ ثورتنا من غير معاد .. مش مِن مكتب الإرشاد
ـ قولوا لـ مكتب الإرشاد .. مصر بلدنا مش مزاد

ـ اللى يبيع دمـ الشهيد .. يبقى حزب وطنى جديد
ـ يا إخوان مش احتفالية .. لينا مطالبنا الثورية
ـ دى ثورة .. مش حفلة !

ـ الميدان مليان مليان .. ضد العسكر و الإخوان

ـ إرحل إرحل يا إخوان .. الشرعية من الميدان

ـ برة برة يا إخوان

و طالبنا طردهمـ من الميدان ..
و كل دة أصلاً و همـ ولا سامعيننا ..
اللى يختلف معاهمـ يحاولوا يسكتوه بـ صوت القرآن ؟؟!
و بعدين المفروض القرآن لو شغّال نستمع إليه ...
فـ معنى انهمـ مشغلينه يبقى عايزين الكل يسكت ؟!
فييييييين لمّا وقفوا القرآن ...
بعدها احنا كملنا مع نفسنا عادى ..
بعد فترة لقيناهمـ شالوا كلمة "العيد" من فوق المنصة


احنا افتكرناهمـ مشيوا ..
بسـ على آذان العِشا أذنوا ..
و بعد شوية شغلوا المنصة تانى .. بسـ مش قرآن كانوا همـ بيتكلموا ..
المهمـ احنا من وقت للتانى كنا بنهتف ضدهمـ مع التأكيد ان دى ثورة مش حفلة


راح الإخوان حاولوا يعيشوا دور الضحية .. و هتفوا "إيد واحدة"ـ
وقتها طلع شاب عندنا على المنصة ..
و قال احنا عايزين نرد عليهمـ ... و طلب نهتف معاه

لقيناه بيقول : إيد و....(مش نضيفة يعنى )
البعض هتف معاه .. بسـ الأغلبية رفضوا و شاورناله "لأ"
راح الشباب و كلنا طلبنا منه ينزل و كلنا هتفنا " إنــــزل إنــزل إنـــزل " ! ـ


و بعدها جالنا أخبار ان التليفزيون المصرى بيقول ان فيه مشاحنات دامية بين الإخوان و 6 إبريل !
هتفنا بعد الخبر دة " كاذبون كاذبون " و " يسقط يسقط حكمـ العسكر "ـ

كانت كل هتفاتنا من مكاننا ...
و مافيش أى حاجة حصلت غير اللى مكتوب فوق دة !



محاولات التشويه المرة دى ..
اننا هاجمنا الإخوان عشان همـ بيحتفلوا ..
مش حقيقى ...
أولا أيوة احنا ضد الإحتفال و تقسيمـ التورتة !
بسـ مش دة اللى خلانا نهتف ضدهمـ و نطالبهمـ بـ طردهمـ من الميدان ..
اللى خلانا نعمل كدة ... هو انهمـ بيحاولوا يغطوا على صوتنا بـ صوت القرآن ..
عشان احنا اللى بنختلف معاهمـ ...


اللى ينقل الصورة ياريت يكون شافها بـ عينه مش مجرد نقل كلامـ !

♥ 2011 ♥

مستغربة من الناسـ اللى مستعجلة 2011 تخلص ...

يا جماعة داحنا نطقنا فيها ... بدل المافيش اللى كنا فيه دة :D

و اكتر سنة ربنا كرمنا بـ شهداء ... يارب احنا اللاحقون فى 2012 ان شاء الله ..

بقينا نتكلمـ و نقول رأينا ... حتى لو عمّالين نخبط فى بعض ...
معلش ماحنا مش متعودين عالديمقراطية ... فـ طبيعى نخبط دلوقتى ..

بقينا نفهمـ و نهتمـ و نشاركـ كمان فى اللى بيحصل فى الأحداث ..

أسقطنا حسنى مباركـ ... صحيح هو عايش حياته بـ راحته .. و لسة باقى نظامه فى الحُكمـ ... بسـ أسقطناه و شفناه فى قفص الإتهامـ !

ظهرت الفرق الـ underground
اللى كانت مدفونة رغمـ مواهبها و انها عايزة توصل رسالة و فكرة كويسة

بدأ ينتشر الإعلامـ البديل ...

و بدأنا نشوف وعى و إبداع و نتج عنه مع الوقت كمان زيادة الحرص على الوعى 

و ساعد على نشر الحقايق بدل محاولات التزييف اللى مازالت مستمرة حتى الآن ..

مش بسـ الإعلامـ البديل ..

حصلت طفرة فى الإعلامـ كـ كل ..

صحافة و جرايد جديدة .. و تليفزيون و قنوات جديدة هادفة ..

السنة بدأت من أول دقايق فيها بداية صعبة (حادثة كنيسة القديسين)
و كان باين من اولها شكل السنة انها مش هاتكون سهلة ..

على مدار السنة ... ناسـ ماتت .. خوننا بعض .. ضربنا و اتضربنا و اللى اتسحل و اللى اتهبل و اللى صبر و اللى شقى و اللى باع .. و اللى اتمسكـ بـ الحق أكتر ..

سنة زحمــة اووووووووووى
سنة هانحكى لأولادنا عليها ..

و نتباهى بيها .. و نقولهمـ اننا من جيل الثورة 

ـ 2011 .... علمتينى انى ماتخدعش بـ أول الأشياء ..

فوّقتينى .. و يمكن بقيت انسانة تانية ..

يا 2011 .. انا فيكى حسيت بجد بـ طعمـ الحرية ..

ـ ♥ عمرى فى حياتى ما هنساكى ♥

إمتياز مع مرتبة الشهداء

الف مبروكـ يا دكتور ..

الف مبروكـ يا علاء 

ناجح بـ إمتياز ..

باركوله قوامـ يا زملاء 

باركوله و وصلوله ..

ان احنا بيه سعداء

صحيح دموع عيوننا ..

ماتوقفت عن البكاء

و حزينة عليه قلوبنا ..

على بدر الأطباء

مبروكـ عليكـ شهادتكـ ..

شهادة الشرفاء 

شايفة الملايكة جمبكـ ..

فرحتهمـ ضاوية السماء 

شايفة خالد و مينا ..

فى الجنة ليكـ شركاء

بيشاوروا و ينادوا لينا ..

مِش طالبين حتّى العزاء 

طلبهمـ : نكمل المشوار ..

ارتاحوا .. سامعين النداء 

و مبروكـ عليكوا الإمتياز 

مع مرتبة الشهداء.

مِن رد الإعتبار .. لـ معركة الأوتوبيسـ !

ـ الميدان متأمّن كويسـ ..
ـ وجود طاغى كبييييير اوى للبنات و الستات
ـ اختفاء الإخوان
ـ التركيز على حق البنات اللى اتسحلت و اتهانت .. و على حق الشهداء
ـ اعلان مجلسـ رئاسى مدنى .. و أسماء المرشحين .. و الدعوة لـ بدء جمع التوقيعات
ـ كان فيه شاشتين كبار .. بيتعرض عليهمـ انتهاكات الجيش
ـ يقال إن العدد وصل لـ مليون 

=========================================

صلاة الجمعة .. 

الإمامـ ماكنش الشيخ مظهر شاهين ..
و الإمامـ اللى قامـ بـ الخطبة و الصلاة .. كان بيقول كلامـ غريب ..
مِن قبيل "كاسيات عاريات"  .. توحيد صفوف المسلمين .. و الأدعية كلها كانت للمسلمين مش للمصرين كلهمـ !


أول مالصلاة خلصت ..
واحد قال : فين الإمامـ مظهر فين ؟؟  ودّيتوه فيييين ؟؟!
و الناسـ كلها كانت ضد الإمامـ اللى صلّى بينا دة 
حد برة المسجد قال : كان ناقص يقولنا : أطيعوا المشير !

=========================================

مِن الهتافات :

ـ يسقط يسقط حُكمـ العسكر !
ـ شوفوا الكدب الحصرى .. عالتليفزيون المصرى
ـ يا إعلامنا يا كدّاب .. الميدان مليان شباب
ـ قول .. اتكلمـ .. السلطة لازمـ تتسلمـ 
ـ قول .. ماتخافشى .. المجلسـ لازمـ يمشى
ـ الجدع جدع .. و الجبان جبان .. و احنا يا جدع .. قاعدين فى الميدان
ـ ارفعى راسكـ .. ارفعى راسكـ .. انتِ أشرف ماللى داسكـ
ـ يا علاء يا شهيد .. دمّكـ غالى يا طبيب
ـ يلا يا مصر ثورى ثورى .. ولا طنطاوى ولا جنزورى
ـ جيش مصر بتاعنا .. و المجلسـ باعه و باعنا !
ـ مش عايزنكـ حاكِمـ .. عايزينكـ تتحاكِمـ
ـ ارحل ارحل يا مشير
ـ شيخ الأزهر يا عماد .. هانجيب حقكـ مالأوغاد
ـ يا عساكر يا أوباش .. بنت بلدنا ماتتعرّاش
ـ ثوّار .. أحرار .. هانكمّل المشوار

=========================================

كريمة الحِفناوى (ناشطة سياسية و عضوة فى حركة كفاية):
ـ انا بتهمـ المجلسـ العسكرى انه شوه سمعة مصر
ـ قالوا فيه طرف تالت .. الطرف التالت دة هو الداخلية و الشرطة العسكرية ..
و اللى مش عايزين الثورة تكمل !


-----------------------------------------------

نادر السيّد

أنا نازل النهاردة عشان بناتى .. و مراتى .. و أمى اللى فى البيت ..
آخر حاجة كنت أتوقعها اننا ننزل للسبب دة ..
أتوقع ننزل عشان دمـ الشهدا .. ننزل نجيب حقنا ..
لكن توصل ان بناتنا يتهتكـ عرضها !!


بيقولوا ميدان التحرير مش هو مصر !
بسـ ميدان التحرير هو قلب مصر و اللى بيحركـ الأحداث ..
و انت واقف هتلاقى جمبكـ واحد مسيحى و واحدة محجبة و واحد بجلبية و واحد بتيشيرت و جينز و واحد بـ دقن ..
هى دى مصر

 -----------------------------------------------

رجال الأزهر

رفعوا راسنا .. و وقفوا وقفة تُتحرمـ ..
دافعوا عن حق البنات ..
جابوا أمثلة من صحابيات ..


الشيخ محمد فرحات :
يقال فلان رجل و فلان رجلة ..
فـ مرحبًا بـ رجلات مصر


أقول للجالسين فى البيوت : تبًا لكمـ ..و عار عليكمـ !


هتافات المتظاهرين : الإخوان فين ؟؟ الأزهر أهُمـ !


-----------------------------------------------

والد الشهيد علاء عبد الهادى :
أقسمـ بـ الله ان علاء انضرب و هو بيعالج مريض
أنا فخور انى أبُ الشهيد

=========================================

مجلسـ رئاسى مدنى :

اقتراح بـ تكوين مجلسـ رئاسى مدنى مكون من :ـ
ـ م. نهى الزينى
ـ د. عبد المنعمـ أبو الفتوح
ـ د. محمد البرادعى
ـ أ. حسامـ عيسى
ـ أ. حمدين صبّاحى


اللى عايز السلطة تتنقل للمجلسـ المدنى .. يوقع على البيان دة ..
و هيلاقيه في :
ـ صينية ميدان التحري
ـ شركة بنها
ـ المجمّع
ـ كنتاكى
من 3 بعد الضهر

ت : 01125011635 - 010088376
  unitegypt@yahoo

=========================================

معركة الأتوبيسـ :

ـ بدأت المعركة من أول ماعدينا عالعبّاسية ..
اتفتحت السيرة ...
و الكلامـ كان ان دول "بتوع العبّاسية" عايزين حال البلد يمشى
بدل ما "بلطجية" التحرير ماوقفين حالها

هنا انا اتكلمت :
ـ على فكرة .. انا من البلطجية اللى حضرتكـ بتتكلمـ عنهمـ 
و لو هى دى البلطجة ... يبقى انا فخورة انى بلطجية !

و من هنا بدأت المعركة . . .

هو : احنا بقى ضدكوا
انا : و احنا مش ضدكوا ... احنا ضد رأيكوا لكن مش ضدكوا ..


هو: مايفش حد بينزل التحرير إلا و له مصلحة !
انا : حضرتكـ ازاى تتهمنى كدة علنًا !!
انا واحدة لا مشتركة فى حزب ولا عضوة فى أى حركة .. ولا أعرف حد فى الإنتخابات !!
 
شوية من هنا .. على شوية من هنا ...
المهمـ .. لقيت نفسى و لأول مرة .. انا و ممتى و 3 شباب إسلامين (و لو انى ضد التصنيفات)  فى جبهة .. و باقى الأوتوبيسـ فى جبهة !

لـ درجة انهمـ بيقولوا على فيديوز قتل و سحل المتظاهرين .. متركبة 
قلتلهمـ : يانهار ........ فوتوشوووووووووب !!

انه حزب الكنبة يا معلّمـ ..

صدق اللى قال انه أغلبية ....

مانكرش انى أُحبطت .. و قلقت ..
و حسيت بـ الظلمـ البيّن !  

بسـ طمنتنى كلمة نادر السيد لمّا قال .. ان الميدان هو قلب مصر و هو اللى بيحرّكـ الأحداث ! 

=========================================

البومـ صور:

http://www.facebook.com/media/set/?set=a.2947355286641.217054.1344085800&type=1

يـهـودية و أفتـخر ! ـ

أيوة ... انت مستغرب ليه ؟؟

و ليه دخلت تقرا النوت ..؟

و شدّكـ فيها  ايه ؟؟

مع احترامى ...

بسـ انت مالكـ و مال دينى ؟؟

و تسألنى عنه ليه ؟؟

مش عاجبكـ كلامى ؟

عادى .. ايه يعنى و دى فيها ايه ؟

سؤالكـ كتر عن دينى و عن مِلّتى ..

كل شوية : ديانتِكـ ايه ؟!ـ

و كأنكـ ناوى تطلب إيدى من جدّتى ..

إتوكِسـ ...

هايعجبنى فى واحد زيّكـ ايه ؟؟؟! ـ

سؤالكـ وراه غرض ! ـ

مش عايزة أعرف هو ايه

احتمال يكون مَرض ..

متفشى فى عقلكـ .. اللى ياريت تكشف عليه

و لـ علمكـ بقى .. انا مِش يهودية ...

ومش هاقولكـ ديانتى ايه

عارف ليه ؟

عشان دينى بينى و بين ربّى يا حضرت

أمثالكـ دخلهمـ اييييه ؟؟

رصيد المجلسـ .. و الكاتالوج !

هذه الصورة التقطتها يومـ الجمعة 8 يوليو فى ميدان التحرير ..

جمعة " الثورة أولاُ " يومـ استراد الثورة ..

لن أقول أننى كنت وقتها على اقتناع تامـ بها ..

و لكننى أهوى التقاط صور اللافتات كـ نوع من حصر المطالب أو تسجيل الأحداث ..

و لكننى أشعر بها بـ شدة هذه الأيامـ ..

و ان كنت حتى الآن لا أرى -من وجهة نظرى- أن الرصيد قد نفذ بعد ..

و لكنه بـ كــل تــأكيـــد ... يتمـ السحب منه بـ كثرة ... و حتى بدون ترشيد لاستهلاكـ السحب ! ـ

المجلسـ العسكرى بدأ علاقته بنا كـ حاكمـ بـ تحية لـ شهداء ثورة 25 يناير ..

مؤكدًا فى ذاكـ البيان على ضرورة سرعة انتقال الحكمـ إلى المدنيين

تحية اللواء "محسن الفنجرى" للشهداء .. جعلت قلوبنا ترحب به و بـ المجلسـ العسكرى لاستلامـ حكمـ البلاد فى الفترة الإنتقالية ..

و لكن بـ كل أسف ... نفسـ اللواء و "نفسـ اليد" ... تمـ استخدامهما فى تهديد الثوار ! ـ

بعد خطابين لمـ يأتيا بـ ثمار تُذكر للدكتور عصامـ شرف ..

تجارب المجلسـ :ـ

بدأت أشعر و كأن المجلسـ العسكرى مثل العالِمـ أو المخترع المبتدئ ..

يقومـ بـ مزج السوائل الكيميائية ... فـ تحدث العديد من الإنفجارات ..

و ان لمـ تنجح تلكـ التجربة ... يقومـ بـ تجربة مغايرة ! ـ

و لكن ... عـفـوًا أيها المجلسـ ...

تلكـ التجارب قد تسفر عن انفجارات ان لمـ تستخدمـ السوائل الصحيحة ..

و لكننا لسنا بـ فئران ...

و ان لمـ تكن تعرف الطريقة الصحيحة للـ"ـخلطة"ـ ..

فـ عليكـ متابعة الـ"ـكاتالوج" من ميدان التحرير ! ـ

البيان رقمـ 69 للمجلسـ العسكرى ..

لمـ يكتف المجلسـ بـ تهديداته عبر "إصبع" اللواء محسن الفنجرى ..

بل لجأ فى هذا البيان إلى التخوين ! ـ

ـ" كــــدهــو وِش ! "ـ

هل هذه هى إحدى التجارب فى إدارة شئون البلاد ؟؟! ـ

ما هو الفرق الآن بين "بعض قيادات جماعة الإخوان" و "المجلسـ العسكرى" ؟؟

الأول استخدمـ التكفير لمن يختلف عنه فى الرأى ..

و الثانى استخدمـ التخوين !! ـ

أيها المجلسـ العسكرى :ـ

إذ لمـ يكن رصيدكمـ قد نفذ بعد ..

فـ " خدها نصيحة من مواطنة مصرية مالهاش فى السياسة" ...ـ

الحق نفسكـ ... و هات الكاتالوج من ميدان التحرير .... ! ـ

حـَد فـاهِـمـ ؟

أسر شهداء ؟

ـ لأ لأ دول زمالكاوية ..

ولا فلول ؟

ـ يمكن .. عشان حوار حل المجالسـ المحلية ..

مِش يمكن سلفين ؟

ـ دة اكييييد 100 .. 100

ولا أى متعصبين تانيين ؟

ـ أصدكـ يعنى موضوع كامليا ؟؟

مش عارف .. أنت رأيكـ ايه ؟

ـ رأيي شوية بلطجية ! ـ

ليه بتقول كدة ؟

مش يمكن ثورجية ؟

ـ طب مين الغلطان ؟

طبعًا السلطة العسكرية ! ـ

قنابلهمـ مسيلة للدموع

و كان فيه رصاصات مطاطية

ـ بيضربوها عالمصريين ؟

لأأأ ... دول خونة معاهمـ أجندات أجنبية

ـ و عرفت منين ؟

باين عليهمـ .. و ماينفعش معاهمـ غير الأمور القمعية

ـ أمن البلاد " متزعزع "ـ

أيوة و مافيش أى حماية أمنية

ـ فيه جرحى كتير ..

شوفتهمـ انا نفسى بـ عنيّا

 أصدكـ فى ميدان التحرير ؟

ولا وزارة الداخلية ؟

ـ فى كل حتة

الله يسامح اللى اتسبب فى الأذية

أصدكـ العلمانيين ؟

ـ لأ لأ دى حركات ناسـ ليبرالية

مش يمكن ثورة مضادة

ـ احتمال .. و مش بعيد شوية حرامية

يا رب نفهمـ .. قبل مايجيلنا سكتة قلبية !! ـ

أُنـثـَى .. مِـعَـفـرتـَة

هاتين الصورتين .. التقطتهما لي سالى ..

انهما مختلفتين .. و كأن كل واحدة منهما لـ فتاة مختلفة عن الآخرى ..

تمعنت النظر جيدًا ... و تساءلت :ـ

من منهما أكون ؟

الأولى ... و انا أمتطى الدرّاجة البخارية التى لا أعرف لها صاحب ؟

أمـ الثانية ... و انا وسط الزهور أجلسـ فى استحياء ؟

الأولى هى من يعرفنى بها الجميع ...

هى ما أشعره أنا تجاه ذاتى ...

هى طفولتى التى لمـ اتخل عنها حتى الآن ..

الثانية هى أنا .. و لكن التى لا يعرف أحد عنها شئ ...

ولا حتى أنا . . .

أو على الأقل .. لمـ أكن أعرفها من قبل ..

هى التى بدأت تدخل عالمى بـ قوة ...

ما يثير ذهولى  .. ليسـ دخول تلكـ الثانية إلى عالمى ..

و إنما ... عدمـ معارضتى لها ..

بل على العكسـ .. أستقبلها بـ حفاوة و كأننى كنت بـ انتظارها منذ زمن ! ـ

الأولى .. لا أشعر بـ الخجل منها إطلاقًا ..

بل أننى أكون على فطرتى أكثر عندما تتملكنى ...

أشعر بـ الحرية معها ..

أمّا الثانية .. فـ لا أعلمـ لماذا أشعر أنه يجب عليّ اخفائها ! ـ

فـ انها تربكنى .. تقلقنى .. تساعد فى زيادة سرعة ضربات قلبى .......

شعورى معها ؟

أشكـ أننى على مقدرة من وصفه الآن ...

و لكن لا أخفى أن هناكـ شئ من السعادة أشعره بـ وجودها ..

من منهما أكون ؟

أنا الإثنتين ...

و أعتقد أن جميع بنات حواء كذلكـ ... و لكن مع اختلاف الدرجات

حزينة جدًا .. سعيدة

أرجو ألا يثير عنوانى العجب ..

و لو أننى أعتقد أنه قد فعل ..

قد تقولون أنها ( ترللى ) و بها شئ من الجُنون ..

و ما تقوله الآن ليسـ إلا نوبة مِن نوبات جنونها ..

و لكننى أجاوبكمـ بـ أن أقول لكمـ ( خالِص )ـ ..

بل على العكسـ .. ان الآن فى كامل قواى العقلية كما يقولون   ..

و لكننى بـ الفعل حزينة جدًا سعيدة ..

و لست أتغنى بـ أغنية المطرب على حسين ..

و لكننى فقط أوصف شُعورى ..

و قبل أن تطلق عبارات السخرية .. تأمّل لحظة كلامى ..

مَن مِنّا لمـ يمر عليه شعور مثل هذا ؟؟

و مَن منّا لمـ يشعر بـ أحاسيسـ متضاربة ؟

فـ أحيانًا تكون حزين و سعيد فى آن واحد ..

شجاع جدًا .. و يملؤكـ الخوف ..

أحيانًا تشعر أنكـ مالكـ الدنيا ..

و لكن فى نفسـ الوقت ينقصكـ شئ ما ..

لا أعلمـ كيف نشعر بـ ذلكـ ..

و لكنه احساسـ غريب ..

ولا أعرف تفسيرًا لـ هذا الشعور .. و هذه الأحاسيسـ الـ( مجنونة )ـ ..

فد يكون لديكمـ التفسير ...

فـ لتسمحوا لى أن أطرح هذا السؤال للمناقشة ..

كيف و لماذا نشعر بـ هذه المشاعر المتناقضة ؟؟

علامة حداد !

الف حَسرة عليكى..

يومـ مايبقى حاميكى حراميكى ! ـ

الف آه من قلبى ..

على كل دمعة من عينيكى

عَلَمِكـ عليه علامة حِداد ..

أحمر على ابيض .. زائد سواد

لوّن أرضكـ دمـ الولاد ...

ضحايا الفساد اللى ساد فيكى ! ـ

الغِش عَمـ .. و الوِش سافر ! ـ

و كله على عينكـ يا تاجر ! ـ

طعنوا فى شهامة اللى عافر ..

و قالوا سرق الخير من إيديكى ! ـ

و آخرها فرّقوا بين الصفوف ..

طوب و حطّوه فى بعض الكفوف ..

فوقى دة نيلكـ رافض يشوف ...

سكينة غدر فى قلب معاليكى . . .