يومين سعادة

ساعات بتمنى أخرج من كـُل دة

و أعيشلى حتّى يومين سعادة

بعيد عن كل دوشة و زحمة ..

بعيد عن سيرة العسكر و البيادة

أطير و إيدى فى إيد حبيبى ..

و الدنيا تبقى سكّر زيادة

لا فيها طوبة و لا بلطجية ..

و لا ريحة غاز و لا قهوة سادة !

عالنيل .. بدندن و أسمع مزيكا

عالنيل بتمشّى..
وبدندن وأسمع مزّيكا ♪♫
وحبيبي في بالي.. 

كلمات الغنوة ♪ لايقه عليه..
 تفصيل يا ولاد..
وكأنه معاد...
لمحته قصادي معدّي قبالي ♥

ومالمحنيش....
فندهت عليه.. وماسمعنيش..
جريت وجريت...
ونقرت فكتفه..
لف وبص عليّا الغالى

لمّا عيونه جات في عينيا..
قلبي شد الدقة عليا 
دبت وتهت واتلجلجت..
أصلى فرحت.. 
صدفة وفاقت كل خيالي..

هانقضيها عالنيل نتمشى
على دُرة يعزمنى..
ويدندن لي.. ♪♫
ويغني لي بصوته العالي

بص لي بصة..
وتنّح حبة..
وقال ببرود: مين الشابة؟

قلبى اتخض وتنح راخر
رديت: واحدة وتايهة من الحدوتة..
كان فيه توتة..
ضاعت منّى..
قلت أسأل مين مر عليها..
يمكن ألاقى إجابة لسؤالى

عدّت ثانية.. اتنين وتلاتة..
وبصة أخيرة فيها تباتة..
ولف وكمل مشيه وسابني..
ومافيش ولا كلمة زيادة قالهالى

زاد البرد وقلبى اتجمد..
كأن كمان الهوا متعمّد..
نفخت فكفى.. يمكن أدفى..
 بسـ لا شيء بيدفى البرد..
برد بجد..
والليل اشتد..
والغنوة مش سايباني في حالي.. ♫

مابين كدة و كدة

ما بين نجاح و حزن ..
مستقبل و مشاعر ♥  ..
فراق و تغيير مسار ..
تداخلات كثيرة تربكـ كيانى ..

ـ" ياحبيبتى ليه مستغربة .. لمّا بقول انى حزين جدًا سعيد .......؟"ـ

تركيبة الأنثى البشرية .. تختلف فى مشاعرها ..
قد لا يستطيع بنو آدمـ فهمها جميعًا .. 
أو قد يعجزون عن تفسير بعضها ...
 بسـ هى كدة ...... بـ "أفورتها" و حلوها و مُرّها .. هى كدة !

 مفترق الطرق ....
تعبير مخيف ..

حلمـ عالق ..
و مابين "أحلمـ و أعيش الحلمـ دلوقتى مش بعدين .. و مش مهمـ ازاى .. ولا خدنى حلمى لـ فين"ـ
و " قبل ماتحلمـ فوق .. احلمـ و انت فايق .. قبل ماتطلع فوق .. انزل للحقايق"ـ
يتأرجح قلبى .. 
يرتجف تارة خائفًا ...
و تارة أخرى ينطلق هائمًا ... متحديًا كل القيود ....
 
دايرة الرحلة ...
هكذا هى ...
أناسـ و دروب نسلكها ..
مواقف و معارف و مشاعر ..
عواصف و أمطار و نسيمـ ..

♥ ...

ضد الطوبة و المولوتوف

 

أنا ضد العُنف بـ كل حالاته ..

ضد الطوبة و المولوتوف

مهما عدوى كان جبروته ..

مهما رأيت بـ عيونى الخوف

قولوا غبية أو مثالية ..

قولوا ضعيفة و عضمة طرية

مهما تقولوا هاقول "سلمية"

و هافضل أقولها فـ أى ظروف

عفوًا .. الكرامة الإنسانية لا تتجزأ ..

 عندما نهتف "عيش .. حرية ..عدالة اجتماعية .... عيش .. حرية .. كرامة إنسانية" .. لمـ يكن القصد تحقيق هذه المطالب لـ بعض الناسـ دون غيرها ... و إلا تناقضت المطالب مع العدالة .. حتى لو كانت تلكـ المطالب لـ كلاب الداخلية ! ـ

ثأرنا على من ظلمنا نأخذه عندما تتحقق العدالة ..

الحالات الفردية و المولوتوف و الطوب - الذى لمـ يكن ضمن مبادئ الثورة السلمية التى بدأت - لن يجدى بـ شيء ..

على العكسـ تمامًا ... بل سـ يساهمـ فى تشويه صورة تلكـ الثورة و شبابها ! ـ

هذه الحالات لا تقرُب فى فُحشها ممارسات الداخلية و كلابهمـ ... 

و لكن تكمن خطورتها على الثورة فى تشويه صورة ثوارها الأبطال الذين لا يخشون الموت أو التعذيب .. تكمن فى تضخيمـ حجمـ الذرة السوداء فى قلوبنا ..التى إذا حدث و تضخمت .. سـ نصبح مثل من نعاديهمـ ! ـ

  تحية لـ كل ثورجى سِلمى

فضفضة ليلية

وحدى ...

بعيدًا عن ضوضاء هاتفى المحمول ..

فقطـ مع مدونتى .. و صفحتى .. و عمرو دياب

أيوة عمرو دياب .. مش منير ... طالبة معايا ياعمـ !

أكتب و انا على يقين أنه لن يقرأ كلامى هذا الآن أحد ..

أو ربما حتى لاحقًا ..

حيث أنه لا يوجد الكتير من المهتمين بـ قراءة الخرافات التى أكتبها ..

كما أننى لا أقومـ بـ عمليات الترويج على الوجه الأكمل

لن أهتمـ الآن بـ حجمـ ما آكتبه ..

لا يشغلنى حاليًا أن أحاول تقليله حتى يسهل على من يقرأ قراءته

لدى شعور مؤلمـ بـ الوحدة ..

و فى هذه اللحظة تذكرت مقولة كنت قد قرأتها منذ فترة :ـ

ـ" ماترميش نفسكـ فى بلاعة و ترجع تقول كل اللى حواليا صراصير"ـ

احمـ احمـ ... نأسف على تلكـ العبارات ..

و لكن الحالة واحدة ..

فـ قد قمت بـ إغلاق هاتفى المحمول .. و حسابى الخاص على الفيسبوكـ ..

ثمـ عدت لـ أشعر بـ الوحدة !

و لكننى فى حاجة إليها ..

انه الهروب الصغير الذى كنت قد تحدث عنه منذ سنوات ..

أنا فى حاجة إلى الهروب الصغير .. و ان كنت غير قادرة على احتماله .....

لدى شعور آخر بـ الذنب ..

كما لو أننى ارتكبت ذنبًا ما .. أو تسببت فى كارثة ..

ـ" أنا ماعملتش حاجة .. و ماليش ذنب فـ حاجة "ـ

هكذا أدافع عن نفسى أمامها ..

هل أنا حقًا مذنبة ؟

هل كان بـ استطاعتى منع كارثة ما من الحدوث ؟!

هل حدثت الكارثة من الأصل ؟؟!

ـ" أنا ماعملتش حاجة .. و ماليش ذنب فـ حاجة .. و مش عايزة حاجة"ـ

افتقدت بعض الأشياء ..

افتقدت ابتسامة بعض الأشخاص فى وجهى ..

افتقدت صديقًا عزيزًا .. لمـ يعد صديقًا بعد الآن

افتقدت شيرين ..

افتقدت جيكا .....

الزمن ..

بينسى دايمًا .. 

مع الزمن .. مافيش وعود . . .

الزمن ..مالوهش صاحب ..

مالوهش قلب .. ولا مشاعر .......

حكاية اتولد بعد الموت

لم يكن فى مخيلتى يومـ .. أن تبدأ حكاية ما بعد الموت !
أبحث بين الوجوه ... و انا على يقين أننى لن أراكـ ثانية أخرى فى هذه الدنيا
فقطـ أرى صورتكـ .. ترفرف عاليًا فى السماء ...

ذاكـ الهتاف .. تلكـ الأصوات الرنانة ... تلكـ الأنغامـ التى ترج الميدان ..
لمـ أعد أحتملها ...
لمـ أعد قادرة على الصمود ...
لمـ أعد قادرة على منع الدموع 
فكرة الموت ... على الأرجح لمـ أعد قادرة على تفهمها و استيعابها !

لا توجد وسيلة أستطيع بها التعبير لكـ عمّا بـ داخلى ...
قلبى ينزف حبًا و شوقًا و ألمًا ...

حكايتى معكـ بدأت بعد الموت ..
لدّى شعور انها ستمتد إلى ما بعد موتى

حكايتى مع جيكا

مش فاكرة امتى بـ الظبطـ ...

بسـ خلال السنة دى ..

و كان فـ مسيرة من مسجد الفتح فـ رمسيسـ ... زى بتاعة امبارح كدة .. 

بسـ ماكنش فيها كل الأعداد دى ..

 دى تقريبًا كانت أول مرة فاكراها انى شفتكـ فيها ..

 كانت مسيرة لـ 6 ابريل ..

مش فاكرة كانت مطالبها ايه 

بسـ فاكراكـ ..

و بعد كدة ..

بقيت علىطول أشوفكـ فى المسيرات بـ الذات ..

و هتفت وراكـ كتير ..

ماكنتش أعرف أى حاجة عنكـ ..

غير انكـ عضو فـ 6 ابريل ..

آخر مرّة شفتكـ فيها .. كان يومـ الإتنين اللى قبل اللى فات

يومـ 19 نوفمبر 2012

يومـ الذكرى الأولى لـ أحداث محمد محمود

 يومها شوفتكـ فى المسيرة اللى اتحرّكت من السيدة زينب

 و برضو هتفت وراكـ

يومـ الجمعة 23 نوفمبر 2012 ..

سمعت ان فيه ولد بين الحيا و الموت 

و بعد كدة سمعت انه اتوفى ..

و فضلت كذا يومـ دى المعلومة اللى أعرفها ..

ان الولد اللى اتصاب .. توفى اكلينيكيًا ..

يومـ السبت 24 نوفمبر 2012 ..

مامتى قالتلى : الولد اللى من 6 ابريل مات

الولد اللى من 6 ابريل ؟؟

هو الولد دة كان من 6 ابريل ؟؟

أول صورة جات فى بالى هى صورتكـ ..

لأن انت أكتر حد عارفة وشه من شباب 6 ابريل ..

لأنى دايمًا بهتف وراكـ ..

جريت عالنت ..

و دوّرت .. لقيت صوركـ ..

شكيت فـ نفسى ..

و قلت انى متلخبطة ..

لحد ماشوفت الصورة دى :ـ

و بعدين شوفت صور أكتر و فيديو ..

إتأكدت منه انه انت

تخيل ..

كل دة بشوفكـ و بهتف وراكـ .. 

و ماعرفش إسمكـ غير لمّا تبقى شهيد !

امبارح فى مسيرة مسجد الفتح من رمسيسـ ...

حاجة جوّايا كل شوية تهيألى انى هلاقيكـ متشال على كتف زمايلكـ و بتهتف ..

بسـ ماحصلش ..

اللى حصل .. ان احنا اللى كنا بنهتفلكـ.

وجعت قلبى يا جيكا ... ووحشتنى

ابنى ولد مش عادى

انا ابنى ولد مش عادى

ابنى هايغير تاريخ

و يعمّر بلادى

ابنى ولد مش عادى

ولد كما ألف من الرجال

ولد صَغير لكن هُمامـ 

بـ الحق صوته دايمًا ينادى

 
ربى يحميه من كل شر

شر نفسه و شر غيره و شر "قر"

و شر كيد الأعادى

شر الغرور و الضلال ..

 شر البلية و الأذية 

شر الولية المفترية

 شر الليلادى

ابنى ولد مش عادى

انا ابنى نور الدين

و ناصر بلادى

تخاريف ليلية

يقتحمـ صوت الطائرة المارة صمت الليل بـ الخارج  ..
يتخلل الكلامـ النوبى الذى لمـ أبحث حتى الآن عن معنى له ..
مرّت الطائرة ...

وصلت الأغنية إلى مقطع الأولتراسـ "صاحبى اللى كتفه فـ كتفى بيخلينى متطمن ...."
 و على ذكر الأولتراسـ أتفقد حسابى الخاص على موقع التواصل الإجتماعى "تويتر" ..
لأرى تطورات الأخبار المنتشرة حول "إقتحامـ" الأولتراسـ للنادى الأهلى بـ مدينة نصر ..
أتفقد "الفيسـ بوك" و الصفحة الرسمية لـ UA07 ..
لأ شئ .. لأ أخبار مؤكدة تنفى أو تؤكد ..

" الدباديب .. فى اللعبة أليفة .. ليه فى الغابة بتبقى مخيفة ؟؟! "ـ
بـ غض النظر عن القصد من كلمات هذه الأغنية "الدباديب إعلامـ كدّاب ......"
إلا أننى تساءلت ... الدببة فعلاً مخيفة ... ايه اللى خلاّها تبقى لعبة أطفال و و سيلة تعبير عن الحُب بين المتحابين ؟!
 
 و على ذِكر الحب ♥ .. حدّث ولا حرج . . .
يقولون ما يقولون عن الوِحدة ..
و قد أشعر بها من وقت للآخر ..
إلا أننى أصبحت أفيق كثيرًا على كوابيسـ محيطة بـ من حولى ..
و أخرى محيطة بـ ماضى غير مشجّع ..
فـ أشكر الله على نعمة الـSingle

ـ" توفيق"ـ
قد يكون أكثر مصطلح شعرت به و تفهمت معناه هذا العامـ ..
كذلكـ "البركـة"ـ
البركة فى الرزق أهمـ من الرزق نفسه ..
قد لا يكون معى الكثير من النقود فى أحيان عديدة ... و لكن بركة الرزق دائمًا لها وجود
 
ـ" روتين "ـ ..
شئ ممل .. و أناسـ مملة من ينتهجونه ..
رغبة فى الخروج من الدائرة ..
رغبة فى الإنطلاق و التحليق بعيدًا .. 
فى السماء .. 
قد يكون ذلكـ بجانب الطائرة إيّاها ...
 
When u fly with me .. let your heart believe .. dreams can take u anywhere .. if u just set them free...I believe I can fly
آه و ربنا !

المؤتمر الأول للتيار الشعبى المصرى (تفريغ)

تفريع للمؤتمر الأول للتيار الشعبى المصرى..
المكان : ميدان عابدين

بدأت الاعداد تتزايد من الساعة السابعة ..

 هتافات قبل بدئ المؤتمر :
 ---------------------------
ـ هى رسالة من عابدين .. لسة الثورة فى الميادين
ـ التيّار الشعبى طالع .. مِـ الحوارى و المصانع ..
ـ التيّار الشعبى طالع ..مـِ الكنيسة و مـ الجوامع
ـ انت يا ويـكا .. يا بتـاع أمـريكا .. أوبـامـا هـذا قـَـتَل أخيكـَ
ـ لوّن وشّكـ بـ الألوان .. مرّة فلول .. مرّة إخوان
ـ تسقط أمريكا .. و كلاب أمريكا .. و عملاء أمريكا
ـ يسقط يسقط حُكمـ المُرشد
ـ تحيا مصر
ـ ثوّار .. أحرار .. بنأسسـ التيّار

بداية المؤتمر :
-----------------
قرآن كريمـ للشيخ القارئ فاروق محمد :

ـ{ يَا أَيُّهَا الَّذِينَ آمَنُواْ اتَّقُواْ اللّهَ حَقَّ تُقَاتِهِ وَلاَ تَمُوتُنَّ إِلاَّ وَأَنتُم مُّسْلِمُون }ـ
وَاعْتَصِمُواْ بِحَبْلِ اللّهِ جَمِيعاً وَلاَ تَفَرَّقُواْ وَاذْكُرُواْ نِعْمَتَ اللّهِ عَلَيْكُمْ إِذْ كُنتُمْ أَعْدَاء فَأَلَّفَ بَيْنَ قُلُوبِكُمْ فَأَصْبَحْتُم بِنِعْمَتِهِ إِخْوَاناً }ـ .....

حَمدى قنديل :ـ
-------------------
ـ التيار الشعبى المصرى هو التيّار الوطنى الجامع .. لأنه يمثل روح 25 يناير
ـ التيار الشعبى هو الأقدر على تحقيق أهداف 25 يناير 
ـ انتمائكمـ للتيار الشعبى لابد أن تتبَعوه بـ الإنتشار داخل المحاظفات و القُرى
ـ تأكدوا أن مادامـ فى استطاعتكمـ أن تتجمّعوا هكذا .. لن يستطيع أحد أن يفرقكمـ 
ـ طالما أنتمـ وراء أهداف الثورة .. و أهداف التيّار الشعبى المصرى .. لن يستطيع أحد أن يغيركمـ

عبد الحكيمـ جمال عبد الناصر :ـ
-------------------------------
ـ( بـ مجرد ذكر الإسمـ .. هتف الحضور : ناصر .. ناصر .. ناصر ..)ـ

ـ نجتمع لـ نعلمـ أن الثورة مستمرة .. و نُعلن ميلاد التيّار
ـ التيّار الشعبى الذى يمثل الشعب المصرى .. و الشعب العربى .. فى عيش و حرية و عدالة اجتماعية و كرامة انسانية
ـ نبدأ تاريخ جديد .. يقول ان المصرى فى المقدمة .. و قائدة العالمـ العربى .. و منارة العالمـ الإسلامى
ـ احنا شعب بسيط .. لكن أحلامه كبيرة
ـ بنعلن تحالف كـل قوى الشعب .. من عمال و فلاحين و مثقفين و مسلمين و مسيحيين .... أى حد هايحاول يفرّقنا هو الخسران
ـ التيّار الشعبى هو أملنا اللى هانفرض بيه أهداف ثورتنا  .. و هانجيب بيه حق شهدائنا 
ـ العدالة الإجتماعية هى مفتاح الديمقراطية

الأنبا يوحنا إسحاق :ـ
----------------------------
ـ( هتافات .. إيد واحدة )ـ

ـ علينا مسئولية كبيرة .. يجب أن نزرع فى شبابنا القيمـ و الأمل
ـ سوف يسجّل التاريخ بـ حروف من نور .. كل ما قدمتموه و ما ستقدموه لـ شعب مصر
ـ كُل منّا مُطالَب بـ أن يؤدى دوره فى خدمة هذا البلد .. هذا واجب على كُل مصرى

اختتمـ الأنبا يوحنا كلامه بـ دعاء : مُباركـ شعبى مصر .. أعنّا نعمل بـ جد و اجتهاد ..
ثمـ ختمـ بـ : السلامـ عليكمـ و رحمة الله و بركاته

أحمد حرارة :ـ
-------------------
ـ لازمـ الحكومة تعرف ان السحل و الضرب مش هايحصل تانى
ـ لازمـ نشتغل مع بعض من النهاردة .. عشان نلحق المهزلة اللى بتحصل فى الدستور

مصطفى الجندى :ـ
-------------------------
ـ لازمـ يبقى فيه دستور يريّح الشهيد فى تربته .. و يريح أحمد حرارة
ـ جمعيتكمـ بـاطلة لأن مافيهاش ابن حتتكـ .. دستوركمـ باطل !

( هتافات : باطل .. باطل ..)ـ

ـ احنا بننادى بـ الوحدة .. البلد هايشيلها كل المصريين

د. جليلة :ـ
--------------
لو ينفع أدّى لـ أحمد حرارة عينى و كفاية عليا واحدة ..
ـ الشباب دول عينينا 

ـ احنا دلوقتى غزوة العقول
عايزين نوصل للعقول قبل مايوصلها اللحمة و الزيت
اللى هايشبعكـ سنة و لا 2 .. هايجوعكـ باقى العُمر
ـ محتاجين نوصل للعقول

كمال خليل :ـ
 -----------------
ـ إلى د. مُرسى .. دستوركمـ بـاطل ..
ـ من يقترضون من أمريكا لا يحق لهمـ عمل دستور
ـ إلى من يستعدون لـ إعلان قانون الطوارئ .. من يعتقلون ضباط 8 ابريل ..
ولا يضعون قضية الشهداء على عاتق اهتمامكمـ ..
نقول لهمـ : دستــوركمـ بـــاطل

الشيخ إسلامـ حجازى (سيناء) :ـ
-----------------------------------------
ـ نريد عدالة اجتماعية بعيدًا عن التسوّل و الإعانة
ـ نريد حرية للتظاهر السلمى .. فـ أنا حـُر ما لمـ أضُر
ـ فـ لتذهب المعونة إلى الجحيمـ .. و لـ تبقى الكرامة فوق كـُل اعتبار

حمدين صباحى :ـ
-----------------------
ـ( "أهو أهو أهوووو .. الرئيسـ أهووووو" هتافات استمرت تقريبًا طوال إلقاء كلمته )ـ

ـ و ما النصر إلا من عند الله 
ـ إذا حضرتمـ أنتمـ .. إذا حضَر الشعب .. فـ لا كلمة لى ..
فـ الكلمة كلمتكمـ .. و الوطن وطنكمـ .. و الثورة ثورتكمـ 
حضوركمـ اليومـ من كل محافظات مصر .. هو الكلمة الحقيقة فى هذه الليلة
ـ بـ اسمنا نحن المصريون .. المؤمنون بـ وطنيتنا .. المؤمنون بـ شعب مصر العظيمـ .. بـ فلاحيه و عماليه (...الخ)
بـ اسمـ المصريين لا نميز بين أحد منهمـ .. 
نحن المصريون الذين نحب مصر
المؤمنون بـ وحدة تاريخنا الحديث .. المئمنون بـ ثورة 25 يناير ..
و أبناء ثورة يوليو العظيمة .. و أحفاد ثورة 1919

ـ نحن المصريين نعتصمـ بـ قلب الإسلامـ العظيمـ .. و قلب المسيحية .. 
ـ نحن أبناء الفقراء .. واثقين فى الله و فى شعبنا .. نعــلـن قيـامـ التيـار الشـعـبـى المـصـرى

ـ(هتافات : ثوار .. أحرار .. بنأسسـ التيّار )ـ

ـ التيار الشعبى هو باب للطمأنينة لـ كل الخائفين عندما يتصارع الخوف والطمأنينة
ـ التيّار الشعبى هو باب المحبة عندما يتصارع الكراهية و المحبة

ـ يا أيها الرائعون .. يا أيها المخلصون .. يا أيها المطئنون ..
على بركة الله .. و بـ بركة دمـ الشهداء ..
تُعلنون بـ حشودكمـ اليومـ قيامـ تيار يُعطى و يُضحّى 
و لـن يكون للتيّار الشعبى المصرى أى مطمع سياسى 

مهـامـ التيّار 



ـ1. عمل خدمى بيئى
ـ2. إنشاء شركات تعاونية .. لـ حل أزمة العيش و البطالة
ـ3. عمل ثقافى يخافب العقل و الوجدان (الفن و الأدب و الجرافيتى ....)ـ
ـ4. كشّافة و جوّالة و مسابقات رياضية
ـ5. التثقيف السياسى

للإطلاع على المزيد من تفاصيل المهامـ الـ5 .. إضغط هُنا

ـ التيار مش حـزب .. هو تنظيمـ جماهيرى يخدمـ الناسـ
ماحدش بيمثلة .. و انا جندى فيه زيكوا بـ الظبط .. 
لا انا رئيسه ولا بمثله .. 
انتوا اللى هتختاروا

ـ انتوا أصحاب الكلمة ..
و انتوا قلتولى و قولتوا لـ غيرى اننا غلطنا عشان ماتوحدناش ..
احنا آسفين .. احنا غلطنا و اتعلمنا من غلطنا .. 
و سنتوحد فى تيّار واحد
و نناضل من أجل المساواه و تحقيق دولة القانون

ـ نعاهد الله و نعاهدكمـ جميعًا ..
على أن نخلص النية و القول و العمل لـ تحقيق هذه الأهداف

ـ أعلن أن التيّار ـ كـ جزء من التزاماته ـ فـ هو مسئول عن أن يدافع عن الذين دافعوا عنّا 

ـ أستنكر و أدين و أناضل ضد الكراهية ..
ـ الرسول أعظمـ من أن يُسئ إليه المُسيئون ..
ـ نُطالب بـ موقف حكومى حاسمـ يرد اعتبارنا
ـ نطالب بـ قانون دولى يحترمـ حقوق الأديان و المقدسات

ـ سنتلزمـ بـ أهداف ثورتنا
ـ نحن مطمئنين بـ الله و الشعب ..
واثقون بـ أن الثورة سوف ننتصر و نحن جنودها

ـ النصر لكمـ .. و انتمـ جديرين به .. و قادرون عليه 

هتافات :ـ
ـ يسقط يسقط حُكمـ المرشد
ـ شمال .. يمين .. بنحبكـ يا حمدين

جورج إسحاق :ـ
----------------------

ـ تحية لـ شهداء مصر و اليمن و ليبيا و تونسـ و سوريا
ـ كُل الخزى و العار لـ محاولات إزالة آثار الثورة
سوف نرسمـ على كل حوائط مصر
ـ طول مانتمـ موجودين مع بعض و إيد واحدة .. ماحدش هايقدر يسرق مصر أبدًا
مصر استعادناها فى 25 يناير
سوف نظل نكافح و نناضل و الثورة مستمرة
ـ الدستور اللى بيتحط دلوقتى احنا جميعًا مش مشاركين فيه
و نريد لجنة دستورية جديدة
نريد انتخابات جديدة بعد سنتين على الأقل بـ موجب الدستور الجديد !


رضا عبد العزيز :ـ

-----------------------------------

ـ( شاعر .. مصاب من مصابى الثورة "فقد عينيه" .. قدمه الشاعر سيد حجاب )ـ

آه يا بلد فيكى الشهيد بقى بلطجى 
و السفيه عامل مناضل و ثورجى
و الثورجى بيقولوا عليه مُستفيد و أونطجى !

عزة بلبع :ـ
---------------
ـ أخيرًا اتجمّعنا على إيدين المناضل العظيمـ حمدين صباحى !

و اختُتِمـ المؤتمر بـ أغنية الفنانة عزة بلبع "الجدع جدع .. و الجبان جبان) .. ثمـ جزء من قصيدة للشاعر زين العابدين فؤاد .. ثمـ غناء فريق بساطة .