عم أمين

عمـ أمين ... حارسـ مسجد الطاوى .. المسجد اللى كان عند بيتنا القديمـ ..

معرفش ليه إفتكرته النهاردة ..

وقتها على ما أتذكر .. مكانتش خطبة الجمعة ليها علاقة بـ السياسة ..

خطبة الجمعة .. كانت درسـ دين .. مش درسـ سياسى ..

صحيح كان فيه بعضها متشدد شوية .. بسـ كان الكلامـ كله ف الدين ...

أيامها كنت بلعب فى الشارع مع محمد و مينا ..

لا كان فى بالى ديانة كل واحد ..

ولا حد كان بيكره حد ..

وقتها مكانش ليّا علاقة بـ السياسة ...

كل علاقتى بيها كانت خلال نشرة الأخبار الساعة 9 اللى بابايا كان بيتفرّج عليها ..

مجلسـ الشعب اللى كان بييجى عالقناة الأولى ..

كنت بستناه يخلص ..

عشان أتفرّج على مسلسل الساعة 8

زمان انا كنت فى مدرسة إسلامية ..

كان فيها حصة خاصة (غير حصة الدين) إسمها حصة قرآن ..

فاكرة بعض الشيوخ كانوا كويسين ..

و البعض الآخر كان متشدد ...

كان فيه شيخ بيقولنا : تومـ و جيرى حلال ... و النينجا تيرتلز حرامـ (عشان فيها عُنف)ـ..

المدرسين كان لازمـ يلتزموا بـ الوان معينة للبسـ ..

إسود - أبيض - رمادى

كل المدرسات محجبات ..

و كل التلاميذ مسلمين ..

بعدها فى إعدادى ..

رحت مدرسة إدارتها مسيحية ..

فيها مسلمين و مسيحيين ..

عندى صديقة منهمـ رجعت أشوفها بعد سنين .. 

جمعتنا المياديين فى المظاهرات

الله يرحمكـ يا عمـ أمين ...

لو تشوف خطب الجمعة بقالها كامـ سنة عاملة ايه ..

كنت هاتزعل أوى ..