حياتنا فى الشارع .. تحرش

يومـ حفل تنصيب السيسى ..
حصلت تحرشات جماعية فى التحرير ..
وصلت لـ حد الإغتصاب ..

مش عارفة الفيديو اللى انتشر كان صح و لا لأ ينتشر ..
بسـ ماننكرش انه خالى الناسـ كلها تحسـ شوية بـ حجمـ المشكلة اللى بنعيشها ..

انا مش هاتكلمـ هنا عن الحاجات اللى بتقابلنا فى الشارع كـ بنات ..
بسـ هاوصفلكمـ احنا وصلنا لـ ايه ..

انت كـ ولد أو راجل ..
أقصى حاجة ممكن تخاف منها و انت ماشى فى الشارع ..
انكـ تتثبت و تتسرق ..
و كبيركـ ... هاتتقتل ..
يابختكـ ... انت فعلاً عايش فى أمان :)

إحنا بقى البنات و الستات ..
بنخاف من نظرات الذكور لينا ..
حياتنا برة الشارع كلها متراقبة ..

بنختار الطريق اللى ممكن يكون فيه أقل خطورة ...
مش الطريق الأمان ...
عشان أصلاً مافيش أمان فى الشارع لينا !

احنا مش بنخاف نتقتل ..
لأن القتل هين جنب أمور تانية ..

وصل الحال بينا اننا فى عز النهار ممكن تلاقينا بنجرى فى الشارع ..
لـ مجرد اننا سامعين صوت خطوات ماشية ورانا ..

و احنا فى المواصلات ..
كل شوية يجيلنا وسواسـ ان اللى قاعد ورانا بيضايقنا ..
فـ ماتستغربش لو قدامكـ بنت كل شوية تلاقيها بتبصلكـ فجأة و بتبرقلكـ

لو ماشيين فى شارع عمومى فيه عربيات ..
بنفكر الف مرة .. نمشى الناحية اللى تبقى العربيات فى وشنا و قريبة ..
و لا الناحية التانية اللى العربيات جاية من ورانا بسـ بعيدة شوية ؟

أنا متـــأكدة ..
ان حتى بعد فيديو التحرير ..
فيه ناسـ كتير مش متخيلة الحجمـ الحقيقى للمشكلة ..
سواء الولاد .. 
أو حتى البنات اللى مابتتحركش في الشارع لوحدها أو من غير عربية

بسـ المشكلة فعلاً أكبر مما تتخيلوا ..
حتى المتحرش نفسه ممكن يكون مش متخيل ..

و الموضوع مش جديد ..
للأسف انى أقول ان من و احنا صغيرين بنتعرض للتحرش ..
الحكاية بسـ زادت الفترة الأخيرة و بقت عالمكشوف أكتر ..

حياتنا كلها فى الشارع بتدور حوالين التحرش ..
يا إما و احنا بنتعرض له بـ الفعل ..
أو و احنا بنهرب منه ..

يمكن ناسـ تقرا الكلامـ دة تقول انى اتجننت ..
بسـ انا مش لوحدى ..
انت بسـ البنات اللى حواليكـ مابتحكيش :)

و نعرف بنات اتجننت فعلاً ..
لو شافت ولد مقرب منها تضربه (حقيقة)ـ
و دة طبعًا من اللى شافته ..

بنشوف البلاوى دى من شباب .. و كبار فى السن .. و أطفال
عشان كدة احنا بنخاف من كــــل الذكور اللى فى الشارع ..
فـ انت لو كنت راجل كبير .. و لقيت بنت جمبكـ فى المواصلات بتبعد شوية ..
ماتزعلش و تقول هى فاكرة هاعمل ايه و انا قد أبوها ..
للأسف اللى قد أبونا دول برضو مابيعتقوش!

الموضوع بيتعقد و بيكبر ..
احنا بقت عندنا ميول عدوانية من اللى بنشوفه ..
الحقونا من الجرائمـ اللى بتحصل فينا ...
قبل ماحنا اللى نبقى مجرمين!