عالنيل بتمشّى..
وبدندن وأسمع مزّيكا ♪♫
وحبيبي في بالي.. كلمات الغنوة ♪ لايقه عليه..
تفصيل يا ولاد..
وكأنه معاد...
لمحته قصادي معدّي قبالي ♥
ومالمحنيش....
فندهت عليه.. وماسمعنيش..
جريت وجريت...
ونقرت فكتفه..
لف وبص عليّا الغالى
لمّا عيونه جات في عينيا..
قلبي شد الدقة عليا
دبت وتهت واتلجلجت..
أصلى فرحت..
صدفة وفاقت كل خيالي..
هانقضيها عالنيل نتمشى
على دُرة يعزمنى..ويدندن لي.. ♪♫
ويغني لي بصوته العالي
بص لي بصة..
وتنّح حبة..
وقال ببرود: مين الشابة؟
قلبى اتخض وتنح راخر
رديت: واحدة وتايهة من الحدوتة..كان فيه توتة..
ضاعت منّى..
قلت أسأل مين مر عليها..
يمكن ألاقى إجابة لسؤالى
عدّت ثانية.. اتنين وتلاتة..
وبصة أخيرة فيها تباتة..
ولف وكمل مشيه وسابني..
ومافيش ولا كلمة زيادة قالهالى
كأن كمان الهوا متعمّد..
نفخت فكفى.. يمكن أدفى..
بسـ لا شيء بيدفى البرد..
برد بجد..
والليل اشتد..
والغنوة مش سايباني في حالي.. ♫
ليست هناك تعليقات:
إرسال تعليق